Inong(Panton meugaseh)

Oleh Nazar Shah Alam

 

Jak lon dodi buju on seuke

Angen buleun lhee jipot tat teuga

Lon peutimang gata mangat be

Bek meulage uroe ka jula

 

Jak lon timang bintang meulaweut

Angen buleun peut leupi lagoina

Ka lon tingku bek neuk tasumprut

Eunteuk rot u yup hana so sangga

 

Jak lon ayon alon on siron

Di buleun limong angen ka mala

Lon jok pawon guna beukeunong

Bek tapeuprom manfaat hana

 

Jak lon tingku meulu di pucok

Angen katrok leupah tat teuga

Kupuduk gata di ateuh tampok

Bek sagai nit brok di singgasana

 

Jak lon nari puti on nibong

Angen gampong meualon laya

Kupuduk gata bak tampok jantong

Bek keuh bungong rom lon ta elanya

 

Jak lon dodi doda lon ayon

Angen peutron sitangke jeumpa

Ban mameh janji dile awai phon

Beutroh bak ujong beumeunan cara

 

Jak lon ayon si bungong pawoh

Bak buleun tujoh angen ka mala

Lage ban tanit beumeusampe troh

Gata lon bungkoh duk sandeng dua

 

Rumoh Jeuneurob, Mei 2012