nazar1Karya Afzhal Armya (Vovo Armya) & Nazar Shah Alam

Vovo Armya

timoeh pisang bue dibineh gampoeng

timoeh bak niboeng toe bineh rimba

loen meulake bue neu ayoen rincoeng

loen sadeu untoeng neubrie lom luka

Nazar Shah Alam

Timoh pisang bue di rimba gadeng
timoh meujandreng ngon pala rimba
Jiteuka tunu wate kubandeng
si puteh licen jifitnah kanda

Vovo Armya

bayam tat rapi timoeh lam lampoeh
gelima luroeh bak tangke muda
pane neuteumeu haba gob jak boh
neu them peu hawoh tuboeh adinda

loen duk teuseupok bak sagoe tameh
bak loen nyum mameh narit yang neuba
neu kaleung rincoeng sama teungoeh prut
hajat neu jurut loen neukoeh dua

Nazar Shah Alam

Pane boh kuyun teurasa mameh
ganto keusaheh keu asam cuka
Pane troh hate gata abang peh
seudang gob cukeh beungeh bang raya

gob keun kah brok bang antok bak binteh
gob keun meulanggeh bang top bak dada
gob keun kah hina bang tak bak taku
gob keun kah brok su bang peh ngon tima

Vovo Armya

pane jiteuka ujeun lam nanggroe
seudang di-uroe suum meu tra-tra
nyoe meunan neukheun kaseb kudeungoe
darah kumanoe demi kakanda

hana kupike soe jeut keulawan
nyang peunteng loen tuan han neukoeh dua
padahai raya siasam meunteu
padahai meukeu meunan neu basa

kaleuh saboeh jan di dalam seupoet
ngoen cadeun ramboet loen neuk neu seuba

Nazar Shah Alam

 Hai lon layang si gapeuh panjo
Keumang mawo di taman raja
Get bak abang brok cit bak adoe
Cit ka lagenyoe nasib nyang tuha

Tatarek rincong tapike adoe
‘oh ta im keudroe hek deungo haba
tabuka silek male bak kawom
Badan meunanggong pijut lam lara

Vovo Armya

sengaja kawe sinan neu tambang
sama teungoeh blang dalam ie ceuko
alah tuboehnyoe na doa keubai

adak koen menan kget wah asoe

Nazar Shah Alam

Kadang cit pade brok keudro lam blang
bek peusalah krang tanoh hana ie
kadang tukang poh cit inong inan
bek peusilik bang ban luka meuri

Vovo Armya

boeh pane dijeut kameng jimeuroet
menyoe jeuneurob rapi seulingka
boeh pane inong inoe yang caroet
euncik meuparoet rot gampoeng loen ba

incik bak taku ngoen taloe tima neu chut
ngoen awe neu nut leumbam sama pha
keumong bak ule incik neu hantoek
keumoeng bak kudoek seubab neuputa

Nazar Shah Alam

Nyoe ka talake bah keu bang peugah
kadang cit ikah tuwo cerita

Incik bak taku ngon inong Ie Lhob
ngon beuso teutot jihayak gata
keumong bak ule but inong Manggeng
gata dipuseng kureung beulanja

Keumong bak kudok ngon plok seulende
bak inong keu lhee kenangan luka