Etty Joseberg Joseph

Ujeun meusintoeng ditroen u bumi
Jie teuka leupie ban saboeh badan
Angen pih dipoet lam teuoet meu i’ i’
Bak teungoh hari leupi kon wayang

Sinoe meuduek ateuh kurusie
Meubuka efbi dengon sikawan
Dang-dang ujeun di berhenti
Ku cie meuca-i peu suum badan

Allah hu Rabbon Ilahom Tuhan
Ka nasip badan sayang han sakrie
Tajak u rantoe han meuhoe badan
Oh ta riewang judoe geubie

Tapula pade mate buet bublang
Tapula bayam mate buet rusa
Ta meukheun oe goh pah lawan
Ta meukheun han, seupi that rasa

 

Nazar Shah Alam

Ujeun meusintong siat ka pirang
cangguk dalam blang meuso tat raya
Jimo jiranggong jiwa ngon badan
tingat rakan kabeh seudia

Geujok le poma hana meusampe
han puah hate takalon gaya
meunyo keu rupa han tat tapike
meunan meuhase naseb di kanda

Meukon bak bara han pah gantung ceng
meukon bak bideng pat sadeu gamba
meukon ngon gata putroe di manggeng
sang han le bang tem meurumoh tangga

Geubri le poma rame nyang laen
nyang canden-canden hana bang hawa
Aleh pu seubab hai puteh licen
hate bang teukhem ka mate rasa

cit sidroe dara bak hate pateng
yang lagak laen hana selera
jino bang tanyong bak putro manggeng
pu ngon bang tatem duk sandeng dua?

 

Etty Joseberg Joseph

Meukrue semangat pukat meuampeng
Sengko ngon kareng payah meusawoek
Haba meupakok pakat meusandeng
Sikuta Bak Drien desa lam calok

Meugah hai meugah nipah di Manggeng
On meusayeng rampeng ngon pokok
Asai ka geucoek ciet ka pah bathen
Meunan ju lazem balot ke rukok

Cem pala kuneng meen bak ranteng
Situlo kureeng diateh tukok
Dak mise hate selahe bathen
Uroenyoe lon tem canden gata cok

Pih that ujen jitron di Tumbok
Geulante sukok lon hiroe hana
Adak pih buta atawa cikok
Meunyoe ka harok anggok kepala

 

Nazar Shah Alam

Allahai bungong keumang di pucok
Harom jih harok bang sigom kuta
haba bang ceungom tabalah tawok
sang sama antok tanyoe mandua

tajak u manggeng rot padang bak jok
pakaian tasok keupakok gaya
bang sadeu harap dara lagak ok
Tuhan nyang peutrok harapan hamba

geumpa tsunami kaleuh pernah trok
reuloh kon be-ok gampong di raja
bek le tasudi cinta nyang bang jok
meusaboh tampok hana bang tuka

keu suai janji bek tat ta-arok
bang duk teuseupok dikeu ulama
quran keu saksi dali bang peutrok
ka bang tak tarok gaseh setia

meunyo ngon kanda bacut bang peutrok
mungken jeut keurok bak pinto kama
Bah tat hareuta hana situsok
tapi bang peutrok pu hawa gata

Adak pih nyawong keu gade bang jok
adak payah trok u nanggroe cina
ban hajat gata meunan bang tumpok
Demi manek rok gata bahgia

 

Etty Joseberg Joseph

Gunoeng Seulawah meutuwah tajak han troek-troek
Jietueka rudoek e bang ek, hitam meutaga
Meusoe han suka e kanda, nyoena nyang geretok
Luka meutajoek e bang ek, na nyang pugra

Lempah that sayang hai bang, bungoeng u di pucoek
Luroeh meutumpoek o bang ek, habeh duem papa
Bukon han suka e kanda, gaseh ta peuroek
U beuna nyang troek e bang ek, hate sedia

Megah that hai bang, gelumbang di pasie Lhok
Oh meuantoek e bang ek, sijuek lam dada
Sinan Selanga e kanda, timoeh sipucoek
Baroesa ban troek e bang ek, meutangke dua

Kiban meugaseh e Tgk puteh segareh pucoek
Kiban e bang ek, bungoeng tampoek peujelah rasa
Bak pintoe kama e kanda mise lah taroek
Meunyoe gop cutoek e bang ek, sang teubuka

Meugruem geulumbang e kumbang lam bade lhok
Jaloe ka meuroek e bang ek, u mieng kuala
Hate ka bangga e raja, hajat bang peutroek
Gohlom na bang ek, bungoeng sipucok ditegur sapa

 

Banda Aceh, 2-3 November 2012