Etty Rismanita

Adak meujuta meuribe sayeng
Hana meupaleng meusiblah muka
Kiban di lua meunan lam bathen
Meunan keuh canden ‘oh ka meu cuba

Seujioh-jioh teureubang ticem
Di meudong kayem bak cabeung pala
Hana le arah hana le laen
Bak cabeung ranteng tetap meugisa

Kapatah sayeup oh troh bak ranteng
Teurbang ho laen hana le daya
Miseu teukeunong geutah peulaken
Sigoe keureuleng hate ka buga

Meunan umpama rasa lam bathen
Hate lee teukhem oh ci teurika
Ka trep that masa bungong bak sandeng
Jipreh peundampeng peusijuk lara

 

Nazar Shah Alam

Allahu Etty si anteng-anteng
jeumpa meujandreng lam taman raja
gata keuh putroe mawo di Manggeng
hana le laen nyang meunan rupa

Aleh hoka su jino po cicem
tan le bak ranteng meulagu-laga
meuho keuh raja keu putro canden
si puteh licen sang tari mata

wahee e buleun lam miga pulen
sibu keuh baten adoe lon lara
peujioh luka putro lagak khem
peujioh lazem luka lam jiwa

tapeuto keuno sidroe nyang malem
peuteupat baten keu adoe kanda
adak tan kaya budi beucanden
beuthat han licen peunteng seutia

Angen seulatan jipot meujandreng
sikudo cicem jipo u rimba
oh no keuh doa keu putro Manggeng
Ya Allah neutem peukabul sigra

 

Etty Rismanita

Meukrue semangat mawoe di Manggeng
Hate ka teukhem doa bak kanda
Adak meupingkoe ka jeulah bathen
Kana nyang ireng dalam istana

Aleh ho judoe e kanda malem
Putroe di Manggeng hate that subra
Thon deungon masa ka rap meulusen
Mantong bak sandeng dara lam luka

Malam pih sepot cahaya pih kleng
Patah ka ranteng teukeujot raya
Seungu lam dada subra lam bathen
Lara meupateng di dalam jiwa

 

Nazar Shah Alam

Saboh keunisah di gampong juleng
Na saboh cicem lagak lagoina
Sigo-go meusu lage seuruleng
jiteuka meusyen seungkak lam dada

Nanggroe nyang jikeun Kuto Di Manggeng
Nan saboh cicem Simeulu Raja
Kuleut meuh pirak sikrak-krak lureng
Hana pat bandeng tari jih raya

Sayang tat pade keunong hama kleng
Sayang po cicem gadoh suara
Meuseubab buleun hana le pateng
Sinan keuh cicem jiteuka lara

Jiteuka rihon lam hate cicem
Buleun jih meusyen gadoh lam miga
Gadoh beureuhi meurana baten
Sidroe po cicem seungu teurasa

Meunan umpama adoe bang bandeng
gatalah cicem meusyen purnama
Taglong ngon patok ubak geunireng
ureung nyang nak tem takot jiteuka

Oh te jipeuto takot tan bandeng
oh neuk keureuleng seulala mata
padahai hate dum ureung laen
Keu mawo licen galak beraya

 

Etty Rismanita

Meukrue semangat engkot seureudeng
Ka talo bandeng meuneng jeunara
Ka nibak gadeh hana meulaen
Ubat peulicen han payah Supra

Keu soai luka cit ka meukureeng
Di dalam bathen teugloeng meucula
Han so eek le boh peugadoeh pateng
Sebab si canden ka meunan kadra

Nibak saboh thon yoh troh tawon kreng
Saboh sinalen gadoeh lam tika
Ngon bangsa Singke seulangke bathen
Pucoek jambe kleng han jet ban pinta

Meunoe teukeudie Allah bie lazem
Keu ubat bathen jioh lagoena
Seungkak that dada oh lon cuba khem
Hancoe meukeupeng, meubura-bura